Tuesday, February 05, 2013

للاسف...انا متأثرتش بأحداث حماده


بعد الفيديو الشهير لحماده و بث القنوات كلها للحقيقه (زى ما بيسموها) تبقى تسؤلات كثيرة......
بعض الشخصيات قالوا: "ده حتى لو كان بلطجي او متحرش ماينفعش يعملوا فيه كده!!!! فين الادميه!!!!"
والله رأى شخصي و ردي الوحيد هو ادمية دى تبقى خالت حضرتك لان انا لو مسكت شخص حاول يلمسنى –مش تحرش حتى- مش مجرد هقلعه هدومه ده انا ممكن ماسبهوش غير لما ماخليش حته فى جسمه سليمه و اكيد اى بنت من الى اتعرضت لتحرش فى الفتره الى فاتت هاتعمل اكتر من كده, فايريت ماحدش يقولي دى ادميه و انسانية لان الى ايده فى الميه مش زى الى ايده فى النار...
هى ليه ديماً ماحدش بيجيب الصورة كامله؟؟؟ ليه كل واحد بيلقط لقطه و يقول السكريبت الى هو عوزه.. سواء قنوات الاخوان او المعارضه او المحايده – اه سورى ده مافيش حد محايد اليومين دول اصلا- او الفلول زى مابيقولوا
صورة واحده لشخص غير معروف مره يقول عليه ده من الثوار و في حته تانيه يقول ده بلطجي و فى حته تالته خااااالص ده من العسكر و فى الاخر الله اعلم مين الراجل ده – انا مش قصدي حماده على فكره انا بتكلم عماً –  حتى حمادة نفسه! قال الحكايه بأكتر من شكل وبالنسبالي كلها غيرمنطقية

طبعاً القنوات دلوقتي بتزيع الفيديو عشان تنشر حقيقه الظلم و الفسسسسااااااااد ده غير كبار المحررين الى بيقبلوا حماده عشان يقدروا ينقلوا الحقيقه الى هو قالها بكذا طريقه مختلفه!...... -_-  والله حاجه تقرف ! القنوات بقيت تتنافس دلوقتي مين الى يشتم مين اكتر و مين الى لازم يطلع التاني غلطان. انا فعلاً مابقتش اصدق غير الى اشوفه بعيني انا لدرجة انى اخر مازهقت من التليفزيون بقيت اتفرج على قناة فتافيت و متشات الكورة دول اكتر حاجه بالنسبالى عندهم مصداقية و بينقلوا وقائع
هو احنا ليه مستنين حد يعملنا حاجه؟؟ ليه عاوزين نغير بني ادم و احنا مابنغيرش نفسنا؟؟ انا مش فارق معايا الرئيس يكون مين دلوقتى لان من راى مش هو الى محتاج يتغير كلنا اتبصتنا اوى بعد الثورة قنا اخيرا الناس بدات تنضف....و حملة من هنا و تنضيف من هنا...دلوقتى خلاص مستانين حد يعملنا كل ده دلوقتي بقى عملنا ايه غير ان احنا بنقتل فى بعض؟؟ و كأن العسكري الى بيتضرب او الولد و البنت الى بيهتفوا دول اسرائليين... ليه كل واحد بيتلكك للتاني و عاوز يعمل الى فى دماغه و بس.....كل بيتكلم عن حق المساكين و الغلابه...طب هو حضرتك عملتلهم ايه؟؟ الدكتور محمد البرادعي حضرتك عملتلهم ايه؟ الاستاذ الى ورا الى بقاله سنتين فى سنه 3 كليه و نازل يتكلم انت عملتلهم ايه؟؟

ليه ماحدش فكر من البشوات الى بيتكلموا كل يوم و التاني انهم يغيروا البلد فعلاً؟ ليه ماحدش يعمل جامعه محترمه لغير القادرين زي مستشفى 57357؟؟ ليه ماحدش فكر يمحي اميه قريه او يعمل مشروع لشباب؟؟ بلاش...ليه مافيش حملات توعية للناس الى مش فاهمه ايه الى بيحصل؟؟ الناس الى نزلت تقول نعم او لا للدستور و هي اصلا مش فاهمة! ليه ماحدش يقدم مشروع لتطوير التعليم من الناس الى اتعلمت بره و خدت شهادات كبيره؟  ليه مافيش دكتور من كلية هندسة يلم الطلاب و يرحوا يصلحوا المباني او فنون جميله يزينوا البلد يعملوا جرافيتي زى الى بيترسم فى التحرير؟؟؟ بس واضح ان كله همه منصب و بس او كله همه يطلع غله فى التاني و يحكم عليه و بس الناس فعلاً مابقتش عارفه هى عاوزه ايه

ليه نستنا حكومه علان و فلان عشان تعملنا كل ده؟؟ بجد والله الناس كلها الى فى الشارع مسؤله عن دم الناس الى راح مش بس الحكومه و مش بس العسكر... ماينفعش بدل لما نغير فالبني ادمين نغير افعال؟؟؟؟
للاسف ماضي الشرطة عندنا كله حافل بأسواء الذكريات خصاً امن الدولة...بس واضح ان ده صفه غالبه فى كل العالم لان اكيد الـ CIA او FBI  مش بيدوا الناس الى بيمسكوهم بنبوني او بقعدوهم فى اوتيلات 5 نجوم! الحاجه الوحيده الى عندنا ومش عندهم هما العساكر الغلابه الى بيكونوا ملطشه من الشعب و من الرتبات الى اكبر منهم مع انهم يا حرام اغلب من الغلابه وكل الى بيعملوه انهم بينفزوا الاوامر بعد ما يتم اقناعهم ان الى قدامه ده عدوه حتى لو ابوه (الى شاف فيلم البرئ بتاع احمد زكي هايفهم) و فى نفس الوقت عمره ما حد سأل عنه و لا الى على جراله او اهتم بيه زي محنا مهتمين بالاخ حماده.
على فكرة انا ولا فى حزب ولا اخوان ولا عندي قرايب ظباط ولا انتخبت مرسي...انا بس مش بحب اعيد كلام الناس بتقوله و كتير منهم مش فاهمه اصلا
و للاسف حتى الان مش متأثرة باحداث حماده (بس والله عندي دم)