بقالي فترة مش بكتب عن الي بيحصل مع ان في دماغي حاحات كتير، بقالنا فترة محصورين في اتخاذ قرارات كتيره و كلها يابيض يا اسود (نعم او لا) و اليومين الى جايين قدامنا قرار بنفس الاجابة ، با ريت ماحدش يسألني انتي هاتقولي اه و لا لا للدستور عشان مش هارد لاني ماعنديش استعداد اني اسمع كلام مالوش لازه او حد الاقيه بيقولي "حررررررررام عليكي"
انا قراري هاخده بنفسي و لو محتاجه مساعده من حد هسأل بنفسي و مش عاوزه حد يقنعني بالعافية بحاجه (يا ريت كل واحد يحتفظ برأيه)....
انا اكتر حاجه كرهتها في الثورة انها صنفت الناس....بقينا كلنا لينا Tag معين (سلفيين - ليبراليين - اخوان - كنبة- طرف تالت..الخ الخ) احتمال كمان يزودولها خانه فى البطاقه و الحمدلله كله دلوقتي مسك فبعضه وبقي يتاخنق عشان نفسه مش عشان مصر.
لو افتكرنا كده احنا عاملنا ثورة ليه؟ عشان التغير...تغير ايه؟ تغير الفقر..الجهل..الرشوة و كل الحاجات الكتيره دي تمام جميل اوى.
كام واحد بقي اتغير بجد؟ حتى لو حاجه بسيطة بس اكيد هتأثر...
للاسف لسه فى ناس بتاخد رشوة و ناس بتعدي و الاشارة حمرا و ناس و ناس و ناس.... واضح كده ان المشكلة ماكنتش فى الرئيس بس..بس في حاجات تانيه كتير.
.................................................................
الجديد اليومين دول بقى ان الى كانوا واقفين مع بعض فى الميدان هما هما الى بيضربوا في بعض دلوقتي وطبعا الناس كمان اتقسموا (انت مع الكفار و لا مع الثوار) و رجعنا تاني للشتايم و الاتهامات و الانتهاكات و قلة الاب..سبحان الله مع ان الهدف كان واحد ايه الى حصل؟
في وسط ده كله انا بتفرج...مش واخده جنب لحد ومش هاخد لاني كرهتهم كلهم سواء الى فالتحرير و الا الى فالاتحادية و لا حتى الى واقفين عند مدينة الانتاج (كل شوية المناطق بتزيد كمان)
رأي: انا مش بحمل الرئيس مسؤلية الناس الى اتضربت سواء من دول او من دول، ليه؟ لان هما الى ضربوا بعض (والله اعلم مين الى بدء) بضبط زي اى خناقه فى حارة مزنزقه (هههه بسام يوسف)
رأي: الاعلام كله زفت زفت زفت و مافيش حد محايد حتى لو جابو ضيف من هنا و من هنا ده غير الناس الى بتنقل كل حاجه منغير ماتعرف و لا حته تسال نفسها هو ده بجد ولا حاجه تانيه و للاسف الحاجات دى بتعل مصايب
رأى: كل مجموعه فيها الكويس و فيها الوحش ماينفعش بأى حال من الاحوال ان احنا نحكم على حد (و ياريت كل واحد يشوف نفسه الاول)
رأى: للاسف كله عمال يشتم يشتم يشتم مافيش حد بيدافع عن نقطه معينه كله بيغلط فى التاني و بقيت مسابقه مين الى يهين التاني اكتر. الناس مبقاش عندها ثقه و لا عندها دم ولا صبر.
رأي: من حق كل انسان ان يعترض ويتظاهر بس مش لازم الخيم و الحمامات والذبح و القرف ده!!!
رأي: ماينفعش اشطرت ان الاستفتاء يتلغي عشان اعمل حوار وطني
رأي: ماينفعش اطالب لحرية وانا اصلا مش بدي حقها لغيري (بصراحه عمر سليمان كان معاه حق لما قال ان احنا مش مجهزين للديمقراطية)
رأي: هانفضل نخون فى الناس لحد امتي والله ده لو سوبر مان هو الى مسك البلد هانطلع فيه القطط الفاطسه برده عشان احنا لسه حاسين بالمؤمرة و الخيانه و التخوين. ربنا يسمحك يا مبارك انت الى شكلتنا على مزاجك (لعنه مبارك تحل علينا) مش سهل اننا نخرج من عك 30 سنه ويمكن اكتر كمان في سنه و لا اتنين...احنا محتاجين دكتور نفساني اصارحه!!
انا زهقت من الناس كلها ونفسي اولع فيهم وادي كل واحد فيهم جوز اقلام و اقله (فوووووووووووووووووووووووووق) كتكم القرف مليتوا البلد! و منفضلك بعد ماتقراء....ارجوك ماتصنفنيش!!!
No comments:
Post a Comment